Korean Peninsula-ah US bomber thlawh kualtir

North Korea-in kar kalta Zirtawpni tlaia intercontinental ballistic missile a enchhin leh avang khan Inrinni khan Korean Peninsula-ah US bomber-te thlawh kual tir an ni.

American official chuan US B-1B bomber bakah South Korea leh Japan air force fighter jet-te tirh a nih thu a sawi a, darkar 10 vel thlawh kual tir a ni. North Korea hian Zirtawpni khan ICBM hi hlawhtling takin a enchhin leh niin a sawi a, he missile hi Hwasong-14 a ni a, minute 47 vel thlawkin km 998-a thui a thlawh hnuah Japan tuipuiah a tla niin sorkar media, Korean Central News Agency chuan a tarlang. NKorea hruaitu, Kim Jong-UN chuan ICBM hmang hian US khawpui pawimawhte chu a kap pha vek niin a sawi.