Morocco lal-in mi 1,000 chuang ngaidam

Morocco lal, King Mohammed VI chuan an ram hmarlam, Rif biala nawrh huaihawtnaa tel avanga man, mi 1,000 chuang chu kar kalta Inrinni khan a ngaihdam thu a puang.

King Mohammed-a’n a ngaihdam hi an vaiin mi 1,178 an ni a, heng mite hi al-Hoceima khua leh a chhehvela nawrh huaihawtnaa telte an ni. Lal hian lalṭuthleng a luah kum 18-na champha pual­in a ngaidam a ni.

Justice Ministry chuan lal-in a ngaihdamte hi pawikhawihna lian tham taka inhnamhnawih lo te an nih thu a sawi.

Lawngchawlh hmun pawimawh, al-Hoceima awmna Rif bialah hian thla rei tak nawrh huaihawt a lo ni tawh a ni. Buaina a chhuahna chhan hi nikum October thlaa sangha mantu pakhatin a season lo laia swordfish a man avanga tihhlum a nih vang nia sawi a ni. He sangha mantu thlavang hauha nawrh huaihawtna kal zelah social movement zau zawk, al-Hirak al-Shaabi tih chu kalpui chhunzawm a ni a, sorkar chu hna thawh tur siamsak tur te, an bial hmasawnna thlen tur leh eirukna titawpa phutin an nawr zui a ni. Sorkar pawhin Rif bialah hian minister-te tirin, major investment tih a tiam tawh bawk a ni.