Qatar hrekna thar siam dawn

Arab ram pali - Saudi Arabia, Egypt, United Arab Emirates (UAE) leh Bahrain foreign minister-te chu nimin khan Bahrain khawpui Manama-ah inhmuin, Qatar ram hrekna thar siam dan chungchang an ngaihtuah.

Qatar ram hi firfiaka chetna thlawp leh, firfiakte pui ṭhinah puhin Arab ram palite hian an inzawnma an lo chhu chat tawh a, an inkalpawhna te an khar hial a ni. Hemi hnu hian an inkar boruak siamṭhat a nih leh theih nana inbiakna nei turin Qatar hnenah hian an thil phutte an thlen a, mahse an thil phut hi Qatar hian zawm a tum loh avangin hrekna thar siam belh an tum nia tarlan a ni.

Arab ram pali-te hian tuipui leh boruak aṭanga Qatar nena an inkalpawhnate chu an khar vek a, hei vang hian nitin khawsakna mamawh lakkhawmna kawngah Qatar hian harsatna a tawk chho mek a, Turkey leh Iran chuan an theih anga puih an tum thu an sawi.

Arab ram pali-te hian Qatar nena inzawmna neia puh mimal leh pawl 18 an lo hrek tawh a ni.