Putin-a'n Russia sipai tam zawk lak belhna tur thupek tichhuak

Russia president Vladimir Putin chuan Ukraine laka beihpui an thlak mek karah, Russia sipai tihlenna tur thupek a tichhuak.

Ningania thupek a tihchhuahah, President Putin chuan Russia sipai 1,37,000 chu maktaduai 1.15 ah tipun a tum a ni. Thupek ang hian Russia military-a thawk chu a pumpuiin 2,039,758-ah tihpun a ni dawn a, heng zingah hian servicemen 1,150,628 an awm dawn a ni. Kum 2018 kumtir khan military-a thawk hi 1,902,758 awmin, an zingah servicemen 1,013,628 an awm.

Sorkar chuan Ukraine-a 'special military operation' an neih mekah chuan sipai, contract-a chhawrte chauh tirh an nih thu a sawi.

Russian media leh non-governmental organisation-te chuan Russia thuneituten Ukraine indonaa mi tam zawk an tirhluh theihnan sipai tam zawk lakbelh hi an tum tih an sawi a, private military contractor-te biain, lungina tangte chu military duty-a tirh an nih theihna atana ngaihdam an nih dan tur thlengin an bia niin an tarlang.

Russia mipa, kum 18-27 inkarte chu kum khat chhung sipaiah ṭang tura tih ni mah se, mi tam tak chuan an hrisel lohna chhuanlam leh, university zirlaite tan ngaihnathiamna a awm avangin an pumpelh thei a ni. Hetianga sipaia ṭan tur pumpelh hi Moscow leh khawpui lian dangah an tam zual a ni.

Sipai lak tur hi kumkhatah vawi hnih buatsaih ṭhin a ni a, April 1 leh October 1-ah neih ṭhin a ni. February 24-a Ukraine-a sipai a thawnluh hma khan Russian military hian contract soldier nuai 4 chuang neiin, chung zinga 1,47,000-te chu lei lam sipaite an ni.