Pakistan court-in PM hlui Imran Khan bail dilna phalsak

Islamabad-a anti-terrorism court chuan Pakistan Tehreek-e-Insaf (PTI) hotu leh prime minister hlui, Imran Khan-a'n interim bail a dilna chu a phalsak.

Kar liamtaa senior police official leh hmeichhe judge-te chunga ṭawngkam mawi lo tak a hman leh a vau avangin PM hlui Khan hi thubuai siamsakin, manna tur thupek tihchhuah a ni.

Judge Raja Jawad Abbas chuan Ningani khan Khan-a bail dilna a ngaihtuah a, intiam kamna atan Pakistani rupee nuai 1 (USD 460) chawi tirin, September 1 thleng bail-a chhuah hi a phalsak a ni. Hemi ni vek hian additional sessions judge, Tahir Abbas Supra pawhin dan loa punkhawmna buatsaiha puhna thubuaiah Khan-a'n interim bail a dilna chu a phalsak bawk a, Pakistani rupee 5,000 (USD 22.8) dah turin a ti bawk.

August 31 hian court thupek zah loa Khan-a puhna chu ngaihtuah a ni ang.

Cricket khelthiam, politics a zuang lut ta Khan hi tunhnai chho hian thubuai hrang hrang siam sak a ni. Kar hmasa khan senior police official leh hmeichhe judge a vau avangin anti-terrorism law bakah contempt of court leh unlawful assembly hnuaiah thubuai siamsak a ni.