Pakistan-ah tuilian vangin mi 1,000 chuang an thi tawh

Pakistan-a ruahsur nasa tak vangin kuminah mi 1,000 chuang an thi tawh a, ram chhung hmun hrang hrangah tuilian vangin harsatna an tawk mek.

National Disaster Management Authority (NDMA) chuan June thla hnuah ruahsur nasa avanga chhiatna thlenga thi zat chu mi 1,033 an tlin tawh thu leh, darkar 24 chhungin mi 119 an thih belh leh tih nimin khan an sawi.

Kabul leh Indus lui chhehvel hmun ṭhenkhat chu tuilian thlen hlauhthawnawmah an din mek thu leh, Nowshera-a Khyber Pakhtunkhwa (KP) province leh Kalabagh bakah Chashma-a Punjab province-te pawh an dinhmun a him loh thu an sawi bawk.

Ram chhunga hmun chanve dawn chu tuiin a chim mek a, a bikin an ram chhim lam, Balochistan, KP leh Sindh province-ahte ruah hi nasa takin a la sur chhunzawm reng a ni. Sindh-ah hian tuilian vangin mi 347 an thi tawh a, Balochistan (238) leh KP (226)-te'n an dawt a ni.

Official-te sawi danin, kumina tuilian vanga chhiatna rapthlak tak thleng chuan mipui maktaduai 33 chuang a nghawng tawh a, hei hian Pakistan mi hmun thuma ṭhena hmun khat zel a nghawng phak a ni. An buh thar, ran vulhte leh chenna in maktaduai chuang a tichhiat sak tawh a ni.

NDMA chuan thlai chinna, ram hectare 8,09,000 chu tuilianin a len chhe tawh a, inkalpawhna kawng km 3,451 leh leidawh 149 a tichhe tawh bawk tih a sawi. Sorkar pawhin an ramin tuilian rapthlak tak an tawrh mek vangin national emergency an puang tawh a, an ram ṭhianṭhate leh thawhpuite aṭangin chhawmdawlna an zawng mek a ni.

Prime minister Shehbaz Sharif chuan United Kingdom-a official trip a neih tur pawh ṭhulhin, international institution leh an thawhpui ramte aṭangin ṭanpuina dapin hma a la mek. US, UK UAE leh ram dangte chuan puih an tum thu sawi tawh ma se, sum tam zawk mamawh a la nih thu official-te chuan an sawi.