Taliban-in ram danga hmeichhia lehkha zir tumte a khap

Afghanistan-a Taliban sorkar chuan an rama hmeichhe zirlaite chu an zirna chhunzawm turin Kazakhstan leh Qatar-ah zinchhuah a khap tih Sputnik report chuan a sawi.

Ram danga zirna chhunzawm tum, mipa leh hmeichhe zirlaite chuan Zirtawpni liam ta khan Kabul chhuahsan an tum a, mahse thuneitute chuan mipa chauhte chu an zirna chhunzawm turin Afghanistan hi chhuahsan a phalsak a ni.

US thlawp sorkar paihthlaa, Taliban-te'n thuneihna an chan hnuah Afghan hmeichhiate dinhmun a chep chho nghal hle.

Taliban hian Afghan hmeichhiate chu an chenna hmun chhuahsana hnathawh a lo khap tawh bakah school thlengin mipa leh hmeichhe inthliarna an kalpui a ni. Hmeichhia, pawl ruk chin chunglam te chu school an kal zawm a phalsak lo. Hei bakah hian hmeichhia zawng zawngte chu vantlang hmuna an chhuah dawnin an hmai khuh zel turin an ti a, intihhlimna lam thilah leh park-ahte an kal dawnin chhungkhat laina hnai mipa tel lo chuan chhuah an phalsak lo bawk a ni.

Kum 2021 August thlaa thuneihna an chan hnua press conference an neih hmasak berah, Taliban chuan sorkar huamzau zawk, ang khat veka rorelna an din tur thu an sawi a, mahse a thusawi erawh an zawm lo hle. Hmeichhia ten zirna, hnathawhna leh khawsak kawnga an dikna chanvote a hreksak nghal a ni.

Tualchhung mite sawi danin, Taliban hian hmeichhiate chu smartphone hman an khapsak a, Womens Affairs Ministry chuan hmeichhiate'n venhimna an dawn tur ang pawh an kuta lut loin an lo huisak ṭhin tih an sawi bawk. Media lama thawk hmeichhia 80% vel te'n an hna an chan tawh a, an rama hmeichhia mtd 18 dawnte chuan an hriselna, zirna leh social rights lamah harsatna lian tak an tawk mek a ni.