Putin-a’n US staff 755 te chhuak turin a ti
US-in Russia ram hrekna a siam chhan let nan, Russia President Vladimir Putin chuan an rama US staff 755-te chu Russia chhuahsan turin a ti.
Kar kalta Zirtawpni khan US staff chhuah tir tur chungchang hi an rel a, nimin khan Putin hian chhuak tura tih zat hi a sawichiang a ni. US staff 755-te hi September 1 ral hmaa Russia chhuahsan hman vek tura tih an ni.
Russia-in an ram aṭanga a hnawtchhuah zingah hian US diplomatic missions hnuaia hnathawktu hrang hrang, Moscow-a US embassy-a thawk te, Ekaterinburg, Vladivostok leh St Petersburg-a consulate-a thawkte pawh a huam tel vek a ni.
US chuan Russia sorkar chetdan chu thil ṭul lo tak niin a sawi a, eng angin nge an chhan let dawn tih an ngaihtuah tur thu state department official chuan a sawi.
TV-a thu a sawinaah, President Putin chuan US embassy leh consulate-ah mi 1,000 chuang thawk an awm mek tih sawiin, US chu an staff awm zat455-ah titlem tura phutin, hnathawktu zinga mi 755-te chuan an hnathawh chu an tawpsan a ngai dawn a ni, a ti. US diplomat-te hmunhma ṭhenkhat pawh sorkar chuan a laksak bawk.
Russia hi kum 2016 US President thlanna neihah khan inrawlha puh a ni a, hei vang hian US Congress chuan Russia hrekna tur hi a pawm ve ve tawh a, White House-ah President Donald Trump-a remtihpuina la turin thawn a ni tawh bawk. US intelligence agency-te chuan President thlannaah khan Donald Trump a chak ngei theih nan Russia hi a inrawlh niin an ngai a, hemi chungchang pawh hi chhui mek a ni. Mahse Russia chuan an puahna hi apha thung a, Trump-a pawn Russia nena an thawhdun loh thu a sawi bawk.