Russia-ah International Army Games ṭan

International Army Games 2017 chu Russia ramah ṭan a ni a, August 12 thleng neih a ni ang.

Russia Defence Minister Sergei Shoigu chuan kar kalta Inrinni khan Army Games hi a hawng. Minister chuan Army Games chu kum thum an neihna a nih thu sawiin, tun ṭumah hian ram 28 aṭangin sipai 3,500 chuang an tel tih a sawi. Europe, Africa leh Latin America aṭang pawhin an tel a ni. Games neih chhoh mekah ram tel an tam belh zel chu lawmawm a tih thu a sawi. Kuminah hian a ṭum khatna atan Bangladesh, Laos, Israel, Morocco, Syria, Thailand, Uzbekistan, Uganda leh South Africa-te an tel.

Kar hnih awh tur, International Army Games-ah hian intihsiakna 28 a awm dawn a, heng zinga 18 chu Russia ramah neih a ni ang a, a dang­te hi Azerbaijan, Belarus, Kazakhstan leh China-ahte neih a ni ang. Japan tuipui, Black Sea leh Capsian Sea-ahte naval competition neih a ni bawk ang.

Moscow-a Alabino training ground-ah tank biathlon neih a ni dawn bawk a, he hunah hian team 19 an tel dawn a ni.