China rama tuilian vangin mi 46,000 sawnchhuak

China-a Sichuan province-a ruah nasa taka a sur avangin Inrinni liam ta khan mi 46,000 chuangte chu sawnchhuah an nih thu tualchhung media-te chuan an sawi.

Khawpui leh prefectures pasarihte chuan ruahsur nasa avanga haratna tawk niin, an zingah hian Chengdu, Guangyuan leh Garze Tibetan Autonomous prefecture area pawh an tel.

Sichuan-a khawpui leh prefecture-te bakah, Chengdu hmar leh hmarthlang lamte chuan tunkar chhung hian ruah nasa takin a la sur chhunzawm dawn nia sawi a ni. Heng bakah Mianyang, Ya'an, Guangyuan, Deyang, Aba leh Garze prefecture-ah pawh a ruah a la sur tam dawn nia sawi a ni bawk.

Central Meteorological Observatory chuan Pathianni khan ruahsur nasat vang hian blue alert an tichhuak a ni.

Tualchhung lam thuneitute chuan Sichuan-a hmun ṭhenkhatah chhiatna nasa zawk a thlen a hlauhthawnawm thu an sawi a, province-a hun eng emaw chen khawkheng an tawrh hnua ruah nasa rawn sur chuan leimin bakah, chhiatna thleng a thlen thei a ni, an ti.

Hmun ṭhenkhatah ruahsur nasa avanga buaina an tawh laiin, National Meteorological Center (NMC) chuan ram chhung hmun ṭhenkhatah khaw lum lutuk avangin yellow alert a tichhuak bawk. Sichuan khawchhak lamah chuan Pathianni khan khaw lum lam hian 40C a thleng a ni.

China-ah hian kum 60 chhunga an rama boruak lum, heatwave nasat ber ṭum thleng mekin, hei han an ram economy lam thleng pawhin a nghawng nia sawi a ni.

Official-te chuan an ram economy ṭhanna tura an target, 5.5% chu an pha lo mai thei niin a sawi. Economic growth hi 0.4% in a tlahniam tawh.