UN team-in Ukraine nuclear plant tlawh dawn

United Nations nuclear watchdog, International Atomic Energy Agency (IAEA) team chuan Ukraine-a Zaporizhzhia nuclear power plant endik turin nimin khan Ukraine an pan.

Ukraine chhimchhak lama awm, Zaporizhzhia nuclear power plant hi Euorpe rama nucleawr power plant lian ber a ni. Russia-in Ukraine a run hnuah, kumin March thla khan Russia sipaiten he plant hi an la a, mahse Ukraine staff-ten an la enkawl zui a ni.

Ram pahnihte inbeihna kal zelah Zaporizhzhia plant pawh hi belh tel nia sawi a nia, August 8 khan plant hi a ṭhenlai kahchhiat a nih thu report a ni. Ukraine lam chuan Russia sipaite kahnaah he plant-a radation sensor pathuma chhia a, hnathawktu ṭhenkhat pawh damdawi-in panpui an ngaih phah niin a sawi.

Hetih lai hian tualchhung lam thuneitu, Russia thlawpte chuan Ukraine sipaiten rocket launcher hmangin plant hi an kap a, administrative building leh nuclear storage facility bul chu an kap chhia niin an puh ve thung.

Ukraine leh Russia hi Zaporizhzhia nuclear power plant beitu leh, pawikhawihna thlentuah an la inpuh tawn reng a ni.

Nuclear power plant beih a ni hi thil pawi tak a nih thu sawiin, UN secretary general Antonio Guterres chuan IAEA inspector-te chu thil thlen dan enfiah turin a ti a ni.

IAEA team hian plant bula inbeihna thlengin plant-a thil tihchhiat a neih dante, a dinhmunte leh staff-te hnathawhna hmun chu a him ṭha em tihte, radiation put hlauhawmin a awm em tihte an enfiah ang.

Russia defence ministry thupuangtu Igor Konashenov chuan an mi thiamten nuclear plant dinhmun chu leh a hnathawh dante chu an enfiah reng thu sawiin, tun dinhmunah chuan radiation dinhmun pawh a pangngai niin, hlauhthawn tur a awm lo niin a sawi. Russia state news agency chuan plant-a nuclear waste storage facility beih tumtu, Ukraine drone kahthlak a nih thu an sawi bawk. Ukraine lamin an beih avangin plant reactor pahnih chu tihtawp a nih thu an sawi.