Detroit leh Houston-a inkahna thlengah mi paruk thi
United States-a Detroit leh Houston khawpuiah Pathianni khan inkahna a thleng leh a, mi paruk an thi.
Detroit police chuan Pathianni zing la hma takah khan khawpui chhung hmun hran ṭheuhah silaia kah hlum, mi pathumte ruang hi hmuh a nih thu sawiin,hmeichhia pahnih leh mipa pakhat an ni tih an sawi. Silaiin vawi eng emaw zat kah an nih thu an sawi bawk.
City police hotu, James White chuan mipa pakhatin pawikhawihtu nia hriat hi car kawngka a bihkual lai hmuin, ding turin a ti a, mahse ani pawh hi silaiin a lo kap a, a tlanchhe zui nghal niin a sawi. Pawikhawihtute nia rinhlelh thlalak hi police-te chuan tlangzarhin, man a nih theihna tura pui turin mipuite an sawm nghal bawk.
"He inkahna hi tum lawkna tel loa kalpui niin a lang. Pakhat chu bus a nghah lai a ni a, pakhatin ui a lo kai a, a dang pakhat leh chu khawlaia lo teihawi mek a ni," tiin White chuan press conference-ah a sawi.
Detroit mayor Mike Duggan chuan pawikhawihtu man ngei a nih theihna turin agency hrang hrangte chuan hma an la a, an rawn inlar leh hun an chang mek a ni, a ti.
Pathianni vek kha Houston khawpuiah pawh silai kengin mi pathum a kaphlum bawk.
House police hotu Troy Finnr chuan pawikhawihtu hian chenna in eng emaw zat a hal phawt a, heng in aṭanga ran tlanchhuakte chu a lo kap a ni tiin, mi pathum a kahhlum thu a sawi. In kang ṭhelhtu, kangṭhelhtu pawl pawh silai kengtu lak aṭang hian an bihruk a ngaih thu a sawi bawk. Mahse a hnuah police-te rawn thlengin, pawikhawihtu hi an kaphlum a ni.
Washington khawpuiah pawh Pathianni vek khan NFL football player pakhat chu silai kah a ni bawk a, mahse a ngaihtuahawm lutuk lo nia sawi a ni. Washington Commanders tana khel, Brian Robinson Jr hi vawi hnih silai hian kahfuh a ni a, damdawi-inah hruai nghal niin, hliam tuar mah se a dinhmun hi a ngaihtuahawm lutuk lo nia report a ni.
US-ah hian inpawng-kahna a thleng fo a, hei vang hian mipuiten silai khuahkhirhna dan khauh zawk siam phut ṭhin mah se roreltu lamin tun thlengin an la pass thei lo.