US-in Venezuela hruaitu Maduro hrekna siam

US sorkar chuan Venezuela President Nicolas Maduro hrekna tur a siam a, US-a Maduro hminga thil awmte chu khawih chet theih lohin a hrensak. US firm leh mimalte chu sumdawnna lama Maduro-a thawhpui a khap bawk. President Maduro-a hrek a nih chhan hi Pathianni-a sawisel hlawh tak, Constituent Assembly inthlan a buatsaih vang a ni.

Eptuten inthlan duh loha nawrh an huaihawt chungin sorkar chuan a kaltlangpui a, President Maduro chuan an ram siamṭhatna turin vote thlak a nih thu leh, an ram hrekna chuan a tihhlauh phah loh thu a sawi.

President Maduro kaihhruai sorkar hian an ram danpui siamṭhat a tum a, danpui siamṭhatu tur Constituent Assembly a din a ni. Maduro chuan an ramin tualchhung buaina a tawh mek te, politics lama buaina an neihte siamṭhatna kawng awmchhun chu ram danpui siamṭhat a nih thu a sawi. Mahse eptu lam chuan hei hi an pawm lo a, President-in thuneihna pumhlum neih a tumna hmanrua niin an sawi thung.

Inthlanah hian vote 42.5% a tla niin election commission chuan a sawi a, mahse eptu lam chuan vote tla hi 12 % vel chauh niin an sawi.

US-in a laka hrekna a siam hi a hlauh loh thu Maduro chuan a sawi a, Donald Trump-a kaihhruai sorkarin thutlukna a siam dan aṭangin huatna a ngah zia a tilang a ni, a ti. Ramdang sorkarte thupek chu a zawm ngai lo a, zawm pawh a tum lo tih a sawi bawk.