Pakistan PM thar tur thlan a ni

Pakistan Supreme Court-in Panama Papers leak chung­changah Nawaz Sharif-a thiam loh chantira prime minister a nihna aṭanga a ban tak avangin nimin khan amah thlaktu tur thlan a ni.

Rorellai party, Pakis­tan Muslim League-Nawaz (PML-N) chuan prime minister atan hian Nawaz Sharif-a nau, Punjab province chief minister Shehbaz Sharif-a chu a ruat a ni. Mahse PM ni tur hian Parliament lower house, National Assembly (NA) member nih a ngai a, Shehbaz Sharif-a hi NA member a la nih loh avang­in PM dinhmun a luah theih hmaa he hna lo chelh lailawktu tur, interim prime minister hi thlan a ngai ta a ni. PML-N chuan an party candidate atan Petroleum Minsiter Shahid Khaqan Abbasi a ruat.

Nimina PM thar tur thlannah hian candidate paruk an awm a, eptu lam chuan candidate inṭawm an siam thei lo. Seat 342 awmna Parliament-ah hian PML-N hian seat 188 neiin majority a nei pha a ni.

Prime Minister thar thlannaa chuhtu dangte chu - eptu party lian ber Pakistan Peoples Party (PPP) candidate Syed Khurshid Shah, Pakis­tan Tehreek-e-Insaf (PTI) aṭangin Sheik Rashid Ahmad, Jamaat-e Islami candidate Sahibzada Tariqullah, leh Mutahida Qaumi Movement (MQM) candidate Kishwar Zahra te an ni.

PML-N in prime minister tura a ruat, Shehbaz Sharif-a hi thla hnih hnuah National Assemby by-election ah thlan tlin a, prime minister dinhmun luah thei tura beisei a ni. Nimina prime minister tur thlanchhuah hian thla hnih hnuah a thuneihna hi a hlanchhawn nghal a ngai dawn a ni.