Turkey-ah mi 486 thubuai ngaihtuah
Kum 2016, July 15-a Turkey sorkar paihthlak tuma beihnaa inhnamhnawiha puha man, mi 486-te thubuai chu nimin khan ngaihtuah a ni.
Ankara-a courtroom-ah mi 486-te thubuai hi ngaihtuah an ni a, heng mite hi tualthah, ram danpui kalha che, President Recep Tayyip Erdogan thah tuma puhna thubuaite siamsak an ni. Sorkar paihthlak tum leh President Erdogan-a thah thuma puh zinga mi pasarih te chu an la bibo mek a, an zingah hian US-a inkhuar Muslim sakhaw hruaitu Fethullah Gulen pawh a tel. Ani hi sorkar paihthlak tuma beihnaa a mawhphurtu berah puh a ni.
Nimina thubuai ngaihtuah zingah hian air force hotu hlu Akin Ozturk leh theology lecturer Adil Oksuz te pawh an tel. Sumdawng lian Kemal Batmaz chu Oksuz-a thawhpuiah puh a ni bawk. Oksuz hi nikum khan man a ni a, mahse chhuah lailawk niin tunah hian a bibo mek a ni. Batmaz hi Ankara khawdaia Sincan tan-inah a tang mek a ni. Turkey sorkar paihthlak tuma beihna kaihhnawihah hian mi 50,000 chu Gulen-a nena inzawmna neiah puhin man an ni tawh.