Iraq khawpuia buaina chhuakah mi 15 thi

Iraq khawpui, Baghdad-a venhim lam hnathawkte leh Shia cleric ṭantute inkara buaina chhuakah mi 15 aia tlem lo an thi tawh.

Buaina hi Shia cleric, Muqtada al-Sadr-a'n politics chawlhsan a tum thu a puan hnu, Thawhṭanni zan aṭang khan a chhuak a ni. Sadr hian Shia Muslim hruaitute leh party-te chu Iraq political system siamṭhat duh lohah puhin, hei hi politics a chawlhsan chhanah a puh a ni.

Official-te chuan Sadr thlawptute hian Presidential Palace an luhchilh nia sawiin, security force-te nena an innawrnaah mi tam takin hliam an tuar a ni. Thawhṭanni zankhua khan khawpui chhungah hian an buai a, silaite hmehpuah a ni bawk.

Buaina chhuah zualna hmun hi khawpuia Green Zone, sorkar building leh foreign embassy-te ho awmna huam chhungah a ni. Intihbuaina thleng vang hian Dutch embassy staff-te chu German mission-ah sawnchhuah an ni.

Security official-te chuan Sadr-a hnungzuitu Peace Brigades leh Iraqi military member inkarah buaina hi a chhuak ti an sawi. Social media-a video darhah chuan fighter ṭhenkhatin ralthuam liantham, Rocket-propelled grenades (RPGs) an hmang lai te pawh hmuh tur a awm.

Iran hian Iraq-a buaina chhuak vangin an ramri chu an khar nghal a, Kuwait chuan a rang thei ang bera Iraq chhuahsan turin an mite a chah bawk.

Nikum October inthlanah hian Sadr lamṭangte hian Parliament-ah seat la hnem ber mah se, sorkarna an siam pha lo a ni. Iran lam thlawp, Shia group dangte nena thawhdun a duh loh avangin, kum khat dawn chu Iraq politics hi a lo buai tawh a ni.