China khawpui ṭhenkhatah Covid khuahkhirhna thar tichhuak

China khawpui lian ṭhenkhatah nimin aṭang khan Covid-19 khuahkhirhna thar an kengkawh leh ṭan. Shenzhen-ah sumdawnna hmun tam zawk khar a ni a,Dalian-ah inkharkhipna kalpui a ni a, school ṭan hun tur pawh eng emaw chen tihkhawtlai a ni dawn bawk.

Shenzhen district, Longhua-a nimin aṭang khan intihhlimna hmun bakah wholesale market leh punkhawmna liantham huaihawt khap a ni. Mipuite chuan residential compound an luh dawnin, darkar 24 chhungin Covid negative result an nei tih finfiahna lantir tur leh, restaurant-te pawh a chhunga leng zat aṭanga 50% bak luhtir lo turin thuneitute chuan thuchhuah an siam. He khuahkhirhna hi Inrinni thleng a awh ang. Thawhṭanni khan district dang pathumah khuahkhirhna hi siam a lo ni tawh bawk a ni.

China hmarthlang lama lawngchawlhna hmun pawimawh, mi maktaduai 3 vel chenna, Dalian-chu nimin aṭanga Pathianni thleng lockdown puan a ni. Mamawh lam turin ni khatah chhungkua member pakhat bak chhuah phal a ni lo.

Chengdu khawpui-a Wuhou leh Qingyang district-ah pawh nimin aṭang khan khuahkhirhna kalpuiin, school luh hun tur pawh tihtlai a ni bawk.

Mi maktaduai 13.7 chenna, Tiajin-ah khawpuia chengte chu nimin khan Covid-19 test an neihpui leh. Inrinni aṭang khan a ruala test hi ṭum li an neihna a ni.

Beijing aṭanga darkar 3.5 vel kal, Shijiazhuang khawpuia district paliah pawh essential worker-te tih loh chu in lam aṭang hna thawk tura tih an ni.

Mainland China-ah hian Thawhṭanni khan tualchhunga Covid kai mi 1,717 an hmuchhuak a, heng zingah hian natna langchhuak mi 349 leh langchhuak lo 1,368 an awm tih Thawhlehnia official data tihchhuah chuan a tarlang.