Russia leh China-in military drill lian tham huaihawt dawn

Russia chuan China sipaite nen thawkdunin venhimna lama an thawhhona ṭhat zia lantirnan military drill lian tham tak huaihawt an tum tih a sawi.

Vostok 2022 (East 2022) exercise hi September 1-7 inkarah Russia Far East leh Sea of Japan leh hmun dangah neih tum niin, hetah hian sipai 50,000 chuang telin, weapon unit 5,000, aircraft 140 leh warship 60 hman a ni dawn tih Russia defence ministry chuan a tarlang.

He drill hi Russia khawchhak lama firing range pasarihah neih tura ruahman a ni a, Soviet ram hlui te bakah, China, India, Laos, Mongolia, Nicaragua leh Syria-te pawh an tel dawn a ni. Ministry sawidanin, Russia airborne troops, long-range bombers leh military cargo plane te pawhin he drill-ah hian tel an tum thu an sawi.

Thla hmasa lama puan lawk tawh exercise neih tur hi Russia-in Ukraine-a beihpui an thlak mek tibuai lo tura ruahmanna awmsa tiin a sawi bawk.