Israel Supreme Court-in Netanyahu chungchang ngaihtuah

Israel Supreme Court chuan eiruk thubuai nei mek, prime minister Benjamin Netanyahu chu sorkar thar siam a, prime minister dinhmun a chelh zawm theih dawn leh dawn loh chung­chang  a ngaihtuah. 

Inthlanpui neih hnuah, Benjamin Netanyahu leh politics lama elpui ber, Blue and White party hotu Benny Gantz-te chuan April thla khan inremna siamin, thuneihna insemzai a ṭang­rual sorkar siam an remti a ni. 

Hruaitu pahnihten inremna an siam ang chuan Netanyahu leh Gantz-te hian prime minister dinhmun hi an inchelh chhawk dawn a ni. Netanyahu hi PM dinhmun hi chelh hmasa in, thla 18 hnuah Gantz hnenah thu­neih­na hi a hlan chhawng ang. 

Mahse ṭangrual sorkar thar siam tur hi party leh pawl ṭhenkhat chuan duh loin, eiruk thubuai nei mek Netanyahu hi thuneihna chelh chhunzawm tir an duh lo a, Supreme Court-ah petition an thehlut ta a ni. Court chuan nimin khan petition hi a ngaihtuah ṭan a, vawiinah ngaihtuah chhunzawm a ni ang.   

Israel danah chuan prime minister chuan thubuai nei mah se, thiam loh chantir a nih hma chuan a hna hi a chelh chhunzawm thei a ni. Netanyahu hi thamna $264,000 dawngah leh, a thuneihna dik lo taka hmang­ah puh a ni a, thiam loh chantir a nih chuan thamna dawnga puhnaah hian kum 10 thleng tantir leh, thuneihna hmangsuala puhnaah hian kum thum thleng tantir theih a ni dawn a ni.