Pakistan PM thar atan Khaqan Abbasi lalut

Pakistan Prime Minister thar atana thlan, rorellai Pakistan Muslim League-Nawaz (PML-N) candidate Shahid Khaqan Abbasi chu prime minister 18-na turin Thawhlehni zan khan rinawmna thu tiamtira lakluh a ni.

Prime minister thar lakluh inkhawm hi Islamabad-a President House-ah neih a ni a, President Mamnoon Hussain chuan rinawmna thu a tiamtir a ni. Inkhawmah hian armed forces hotute, governor, Parliament member, political party hruaitute an tel. Hetih lai hian rorellai PML-N hotu Shawaz Sharif bakah an party-in prime minister tura a ruat, Punjab Chief Minsiter Shehbaz Sharif bakah Chaudhry Nisar-te erawh chu an tel ve lo.

Pakistan Supreme Court-in prime minister aṭanga Nawaz Sharif a ban avangin amah thlaktu tur hi Thawhlehni khan thlan a ni. PMN-L hian Sharif-a thlaktu atan hian a nau, Punjab Chief Minister Shehbaz Sharif-a chu a ruat a, mahse Shehbaz hi National Assemby member a nih loh avangin he dinhmun hi a luah thei rih lo a, thla hnih chhungin by-election buatsaih tum a ni. NA member atana thlan tlin a nih hnuah prime minister atan hian lakluh a ni dawn a, hemi hma chuan Abbasi hian PM dinhmun hi a lo chelh lailawk dawn a ni.

Thawhlehni-a prime minister thar tur thlan­naah party hrang hrangten candidate hran neiin, PM dinhmun chuhtu hi mi paruk an awm a ni. PMN-L candidate Abbasi hian vote 339 tlaah vote 221 a hmu a ni.

PM atana lakluh a nih hnua thu a sawiah, Abbasi chuan Shehbaz Sharif-a chu an ram prime minister dik tak tur a nih thu a sawi a, ani hian a dinhmun hi ni reilote hnuah a rawn luah dawn a ni, a ti. Sharif-a hi parliament member atana thlan tling turin ni 45 hun pek a ni a, hemi chhung hian by-election buatsaih a ni ang. Abbasi chuan ni 45 chhung chauh PM dinhmun hi chelh dawn mah se, theihtawpa hna thawh a tiam a ni.