Air Force One turin Russia tana siam lei dawn

US President Donald Trump-a’n President aircraft, Air Force One thar leina tura sum ruahman tihniam tura a hrilh hnuah, US Air Force chuan 47-8 jetliner pahnih lei tumin Boeing chu inbiakna a neihpui mek.

Boeing-in 47-8 jetliner pahnih a siam hi Russia airline, Transaero-in kum li liam taa a order a ni a, mahse pekchhuah a nih hma, kum 2015 khan he airline hi sum lamah a tlachhia a ni. Hei vang hian aircraft pawh hi an la hman lo a, Mojave Desert-ah dah a ni.

Air Force thupuangtu Ann Stafanek chuan commercial aircraft pahnih lei tur hian inbiakna an nei mek tih sawiin, contract pawh tihfel thuai beisei a nih thu a sawi. He aircraft hi a tlangpuiin pakhat US dollar maktaduai 386 vela hralh a ni.

President Trump hian nikum December thla khan, Boeing-in president thar hman tura 747 Air Force One a siam mek chu a man a to lutuk a, order pawh cancel nghal turin a ti a ni. A man hi dollar tluklehdingawn 4 chuang nia tarlana ni.