Thailand PM hlui pahnih thubuai ngaihtuah

Thailand prime minister hlui pahnih, Yingluck Shinawatra-i leh Somchai Wongsawat-a te chungthu chu Bangkok-ah ngaihtuah a ni.

Prime minister hlui Somchai Wongsawat chu kum 2008-a sorkar duh lohna lantira nawrh huaihawt ṭuma dik lo taka a thuneihna hmangah puhin, National Assembly kawng dangtu eptu pawlte tharum hmanga police-te hnawtdarh tirah puh a ni. Hemi ṭuma buaina chhuak avang hian mi za chuangin hliam an tuar a, mi pahnihin an thih phah a ni. Police-te chu prime minsiter thupek anga che-ah puh an ni.

PM hlui Yingluck Shinawatra-i chu PM a nih laia dik lo taka rice subsidy program kalpuiah puh a ni a, hei vang hian kum 2011 inthlanpuiah an party pawhin hnehna an chan phah nia sawi a ni. Mahse Yingluck-i chuan tih dik loh a neih loh thu sawiin, court hnenah pawh zahngaihna lantir turin a ngen. He scheme kalpui avang hian sorkar chuan sum tam tak a hloh a, Yingluck-i bank account pawh khawih chet theih loha hrensa a lo ni tawh bawk. A thubuai hi August 25 hian relfel a ni ang a, thiam loh chantir a nih chuan kum 10 thleng lung-in tantir theih a ni ang.