NKorea-in Kim Jong Un A la dam thu a puang
Kum 36 mi North Korea supreme leader, Kim Jong Un chu kar liam ta Zirtawpni khan an ram khawpui Pyongyang hmarchhak lama awm, Sunchon khuaa fertilizer factory hawnna inkhawmah red ribbon a chep bung tih, an ram media Korean Central News Agency (KCNA) chuan a tarlang.
Zirtawpnia hun hman nia sawiah hian Kim a thi anih pawha amah thlak thei tura an sawi, a farnu Kim Yo Jong pawh telin, ani bakah hian state affairs commission vice-chairman Pak Pong Ju, cabinet premier Kim Jae Ryong leh midang official ṭhahnem tak an tel bawk a ni. Mipui hmaah Kim Jong Un hi ni 19 zet a inlan loh hnuah hrisel hmel tak leh hlim hmel pu chungin fertilizer factory hawnnaah hian khuallianah a rawn ṭang a ni.
Kum 2014 October thla khan Kim hi kar ruk dawn chu mipui vanthlang hmaah a lo inlan tawh lo a, hemi ṭum hian a hrisel ṭhat loh vang a nih thu media ṭhenkhatte chuan an sawi. Tun ṭuma Kim chanchin hriat loa kar thum dawn a awm chhan hi Covid-19 a kai hlauh vanga bibo niin media ṭhenkhatte chuan an tarlang.
Thi anga a than chhan
April 15 khan Kim hi an ramin a ngaih pawimawh em em, an hnam pa Kim Il-sung piancham lawmnaah a kal lo a, hemi hnuah pawh mipui hmuha a inlan zui tak loh avangin thi niin a thang ta a ni.
South Korea online newspaper Daily NK chuan Kim hi lung lam ṭha lo a neih avangin zai a nih thu a tarlang a, a thau vang leh meizial a zuk nasat vang te, hna a thawh nasat avangtein cardiovascular system procedure hmanga enkawl a nih thu a tarlang bawk.
Kim hi April 11-a Workers' Party politburo meeting-a kaihruai tih loh kha chu vantlang hmaah a inlan tawh lo a, kha meeting-ah khan Covid-19 chungchang sawi ho a ni.
US president Donald Trump chuan Kim a la dam tih a hriat rual hian a twitter lamah a lawm thu a sawi chhuak hial a, Kim a thi tia a than lai khan Trump chuan Kim hi a ṭhianṭha a nih thu a lo sawi tawh bawk a ni.
Report a dik ngei emtih finfiahna awm lo
KCNA in Kim-a hun hman leh, a thlalak a tihchhuahte hi Zirtawpnia thleng ngei a ni em tih finfiahna erawh a awm lo. US chuan Kim hi a la dam ngei chu a ring a, mahse a thlalakte hi Zirtawpnia a lak a ni em tih leh, engvanga hun rei tak mipui hmuha a inlan lohna chhan a sawifiah thei rih lo tih a tarlang.