US-in NKorea-a zin khapna a tichhuak

United States chuan America mite chu North Korea-a zin a khap a, hei hi US zirlai pakhat study tour neia North Korea ram tlawhtu man a nih hnua a thih vang a ni.

North Korea zin khapna thupek hi Nilaini khan tihchhuah a ni a, he khapna hi September 1 aṭanga hman ṭan a ni ang. Official-te chuan an ram mi leh sate tan NKorea zin chu a him tawk lo niin an sawi. North Korea-a America mi awm mekte pawh September 1 hmaa chhuahsan turin a ngen bawk.

Federal Register-in thupek a tihchhuahah, US passport-te chu September 1 aṭangin NKorea zinna turin a hman theih tawh dawn lo a, a kal turte chu a bika phalna siamsak an ngai dawn a ni, a ti.

University of Virginia zirlai, Otto Warmbier chu NKorea an tlawh ṭuma hotel-a poster a lo lak avangin a haw tur chu airport-ah man a ni a, kum 15 tang tura thiam loh chantir a ni. Kum khat chuang zet a tan hnuah nikhaw hre loin a awm a, a damloh hnuah US-ah hruai haw phalsak niin, US thlenpui a nih hnu, kumin June thla khan a thi a ni. He thil thleng avang hian US chuan an ram mite chu aṭul tawp a nih chuan North Korea rama zin lo turin alo ti tawh a ni.

North Korea zin khapna thupek hi kum khat atan hman phawt a ni dawn a, mahse ṭanpui hna thawk tura zinte leh journalist-te erawh chu a huam tel lo ang. Tour company-te chuan he khapna siam hian NKorea tlawhtu khawthlang ram mite a tihtlem phah hle dawn niin an sawi. Khawthlang ram aṭanga NKorea tlawhtu zinga 20% hi US mi an ni.

Kum khat chhunga khawthlang ram aṭanga North Korea tlawhtu khualzin hi mi 5,000 vel an awm ṭhin a, kar khat cham­a an zinna senso hi dollar 2,000 vel a ni. China ram aṭangin NKorea tlawhtu hi an tam thei hle bawk.

North Korea development official, Han Chol-Su chuan US-in zin khapna a siam avang hian an ram economy-in a tawrh phah dawn lo tih a sawi a, US sorkar America mite zin a phallo chu engatan mah an tih loh thu a sawi.