Duterte-a’n firfiakte bei tur sipai 30,000 duh belh

Philippines President Rodrigo Duterte chuan an ram chhim lama Islamic State (IS) firfiak pawl nena inzawmna nei, inlakhran duha helte laka beihpui thlak mekah sipai leh police 30,000 dah belh a duh thu a sawi.

President Duterte chuan Parliament member-te hnenah sipai dah belh a duh thu hi sawiin, dahbelh an nih theihna tura fund pe chhuak turin a ngen. Chhim lam biala helho bei tur hian sipai 20,000 bakah police hnuai­a Special Action Force battalion 10 a mamawh belh tih a sawi a ni.

Mindanao thliarkara Marawi City-a firfiak leh security force-te chu thla thum dawn an inbei tawh a, he inbeihna thleng avang hian civil mi 45, sipai 114 leh hel 471 an thi tawh a ni. Inbeihna thleng avang hian President chuan kumin chhung atan Mindanoa thliarkar­ah hian martial law a lo puang tawh bawk a ni.