Kabul-ah military convoy bei

Afghanistan khawpui, Kabul-ah military convoy chu Ningani zan khan thihchilh bomb hmanga beih a ni a, Nato sipai pakhat thiin midang parukin hliam an tuar.

Nato chuan thuchhuah siamin, firfiakten an beihnaah hian sipai bakah ṭawnglettu atana an hman pakhatin hliam a tuar tel niin a sawi. Qarabagh district-a pawikhawihna thlengah hian civil mi pathum an thi tel nia sawi a ni a, mahse official-a puan erawh a ni tel lo.

Tun thla chhungin Afghanistan-ah hian firfiakte pawikhawihna a thleng fo a, Thawhlehni khan Herat-a mosque beihnaah mi 30 chuang an thi a, Thawhṭanni khan Kabul bula Iraq embassy bulah thihchilh bomb tihpuah niin mi pahnih an thi bawk. Ningani zan vek khan Helmand province-a Gereshk district-ah car bomb tihpuah a ni a, Afghan security force member pali an thi a, mi dang panga-in hliam an tuar. Nilaini khan Kandahar province-ah Taliban firfiakten military convoy beiin, US sipai pahnih an kaphlum a, sipai pali-in hliam an tuar a ni.

United Nations-in a tarlan danin, Afghanitan ramah hian kumi kum chanve chhungin pawikhawihna thlengah civil mi 1,662 an thi tawh a, heng zinga 20% chu Kabul khawpuia cheng an ni.

Taliban firfiak pawl chuan Ningani zana military convoy beitu hi an nih thu a sawi.