Trump-a’n bang siam tur sawisel lo turin Mexico president hrilh
US President Donald Trump chuan Mexico leh US inrina-a hungna bang siam tur chungchang chu sawisel tawh lo turin Mexico President Enrique Pena Nieto a hrilh.
The Washington Post chuan President pahnihte phone-a an inbiakna chungchang hi Ningani khan a tichhuak a, hei hi US President atana Trump-a lakluh a nih aṭanga ni sarih hnu, January 27 ami kha a ni.
2016-a US President thlan dawna a campaign-naah, Trump hian Mexico ramri hungna bang siam a tum thu leh, a senso pawh Mexico tum tir vek a nih tur thu alo sawi tawh a ni. Hei hi Mexico lam chuan an sawisel a, Mexico President Nieto pawhin ramri hungna bang senso hi an tum loh tur thu a sawi a ni. Nieto chuan he thil avang hian US a tlawh tur pawh a lo ṭhulh phah tawh a ni. Trump chuan a thutiam hi tihpuitlin ngei a ni dawn tih sawiin, he thil hi president atana thlan tlin a nihna chhan pakhat niin a sawi. Mexico president hnenah hian ramri hung chu thil pawimawh tak a ni thu leh, senso tumtir an nih tur chungchang a lo sawisel chu sawi tawh lo turin a hrilh a ni.
Thla hmasaa Hamburg-a G20 summit-ah khan President Trump hian ramri hungna senso Mexico tumtir a nih tur chungchang hi a sawi leh a, mahse hemi ṭum hian Nieto chuan engmah a sawichhuak lo. Mahse Mexico foreign minister Luis Videgary chuan amah leh President Nieto chuan Trump-a thusawi hi an hriat ve loh thu a sawi.