Pakistan: Tuilian vangin mi 1,100 an thi tawh, Naupang 380 chuang an tel

Pakistan-a ruahsur nasa tak leh tuilianin chhiatna a thlenah mi 1,100 chuang an thi tawh a, an zingah hian naupang 380 an tel.

Tuilian hian ram chhung hmun thuma ṭhena hmun khat a chim mek nia sawi a ni.

Army helicopter-te chuan tuilian vanga tangkhangte thiar­chhuakin, hmun chhengchhe taka awm pan harsa deuh te hnenah ei turte an thlaksak bawk. Fur ruahtui ṭhahnem tak tla hian chenna in, sum­dawnna, infrastructure leh thlai tharchhuah te a tichhia a, Pakistan mipui matkaduai 220 zinga 15%, mi maktaduai 33 vel chuan harsatna an tawk mek a ni.

Pakistan hian kumin ruahtui a dawng hnem hle a, kum 30 chhunga kum khata ruahtui tla ṭhin aiin August quarter chhung khan ruahtui tla hi 190% zetin a tam a ni. Sindh province chu ruahtui dawng hnem ber niin, kum 30 chhunga an dawn ṭhin zat aiin kuminah 466% in an dawng hnem tawh zawk.

Climate Change Minister Sherry Rehman chuan an ram hmun thuma ṭhena hmun khat chu tuiin a chim mek tih sawiin, an rama chhiatna thleng chu tehkhin ngaihna awm lo niin a sawi. Prime minister Shehbaz Sharif chuan Islamabad-a thuthar lakhawmtute a kawmnaah, ruahsur leh tuilian vanga thi zingah naupang 380 an tel thu hi a sawi a ni. Harsatna an tawh mekah ṭanpui turin ramdangte a ngen bawk.

US chuan Pakistan rama tuilian tuarte ṭanpuina tur hian USAID kaltlangin USD mtd 30 a pek tur thu a puang. Pakistan ramin chhiatna a tawh mek chu an tawrhpui thu a sawi.

United Nations secretary-general Antonio Guterres pawhin Pakistan ṭanpuina turin USD mtd 160 mamawh a nih thu sawiin, ṭanpuina pe tur hian ram dang a ngen a ni. Pakistan chuan puihna a mamawh takzet tih sawiin, mipuite harsatna tawh mek chu ngaihsak turin ram dangte a ngen a ni.

Meteorologist-te chuan Pakis­tan-ah ruah hi a la sur chhun­zawm dawn niin an sawi bawk.