UN hotu-in Tuilian tuar Pakistan tlawh dawn

UN hotu Antonio Guterres chuan tuilian vanga harsatna tawk mek, Pakistan-in harsatna an tawh dante a hmuna zirchiang tur leh, UN lamin chhawmdawlna an pek dan turte enfiah turin kar leh hian a tlawh dawn.

Sum lama talbuai mek, Pakis­tan sorkar leh United Nations ṭangkawp chuan Pakistan rama tuilianin chhiatna a thlen tuartu, mi maktduai 33 chuangte puihna tur ṭanpuina, USD mtd 160 mamawh a nih thu hi an lo puang tawh bawk.

Pakistan-a khuarel chhiatna thleng vanga nunna chan hi Nilaini thleng khan mi 1,162 an tling tawh a, hliam tuar 3,554 leh chenna nei lo mtd 33 an awm tih National Disaster Management Authority (NMDA) data chuan a tarlang.

Thawhlehnia UN thuchhuah chuan, Secretary-General Guterres hi tuilian rapthlak tak vanga mi maktaduai telin an tawrhna rapthlak tak chu a hmun ngeia enfiah turin a zin dawn a ni, a ti. Guterres hi September 9 hian Islamabad thleng tura beisei a ni a, chhiatna thlen nasat zualna hmunte a tlawh dawn a ni.

Pakistan-a foreign affairs thupuangtu, Asim Iftikhar Ahmad chuan UN hotu lo zin tur hi a lawm thu sawiin, "Vanduaina kan hmachhawnna kawngah nasa takin min pui thei dawn a ni," a ti.

Thawhlehni khan Pakistan Flood Response Plan pui tura ngenna video message hi Guterres chuan a lo tichhuak tawh a, "Pakistan mipuite chuan fur ruahtui ṭhahnem tak an dawng a, ruahsur leh tuilian rapthlak tak nghawng hi a na hle. Khuarel chhiatna avang hian mi 1,000 chuang an thi tawh a, ṭhahnem takin hliam an tuar bawk a ni," a ti.

Mi maktaduai chuangte chu chenna hmun nei lo an awm a, school leh health facility pawh chhiain, an ei hmuhna leh infrastructure pawimawh tak tak te pawh a len chhe tawh a, mipuite beiseina leh suangtuahna chu len boin a awm a ni, tiin Guterres chuan a sawi.