IMF-in Sri Lanka tan USD tld 2.9 puk tir a remti

International Monetary Fund (IMF) chuan economy lama talbuai mek, Sri Lanka chhawmdawlnan USD tlukleh­dingawn 2.9 puktir a remti.

Sri Lanka hi foreign exchange reserve lamah a tlakchhiat avangin, kum 1948-a Britain aṭanga zalenna an chan hnuah economy lama an tlak chhiat ber ṭum an tawng mek a ni.

"IMF staff leh Sri Lanka thuneitute chuan Sri Lanka economy khaichhuahna tur, thla 48 awh staff-level agreement siamin, Extended Fund Facility (EFF) hnuaiah USD tld 2.9 puktir turin ruahmanna an siam a ni," tiin IMF thuchhuah chuan a sawi. He inremna hmang hian macroeconomic ngelnghet zawk leh leiba tihziaawmna tur bakah, sum lakluhna ṭha nei tura hmalaknate chu an ngaihpawimawh zual turte an ni.

Sri Lanka hian April thla aṭang khan sum puk zawngin inbiakna an lo nei ṭan tawh a, ram pawn aṭangin bungrua an lakluh theih tawh loh thu an nemnghet tawh a ni. IMF ngenna angin sorkar chuan an leiba tihzangkhaina turin legal leh debt advisor an ruat zui nghal bawk.

Mipui maktaduai 22 vel chenna, Sri Lanka hian thla hmasa khan politics-ah buaina tawk chho lehin, sorkarin an ram economy a enkawl danah mipuite chu an lungawi lo a, nawrh huaihawtin president Gotabaya Rajapaksa chu ram pawn lamah a tlanchhiat phah a ni. A tlanchhiat hnuah President aṭanga banna thehlutin, a thawhpui, finance minister leh IMF inbiakna neihpuitu zinga mi, Wickremesinghe chu President atan thlan a ni zui bawk.

Sri Lanka hian leiba USD tld 51 hu a nei a, chung zinga USD tld 28 te chu kum 2027 hmaa pek hman tura tih an ni. Sri Lanka-a thil man sanna hi August thlaah 64.3%-ah kai chhoin, fuel man a san chhunzawm zel bawk. World Bank-in zirchianna an neih hnuhnung bera an tarlan danin, Sri Lanka hi khawvela eitur lam chi ah thil man san chakna ram pangana a ni.