Israel missile-in Aleppo airport a kap

Israel chuan Syria khawpui pakhat, Aleppo-a airport chu missile hmangin an kap tih Syria official SANA news agency chuan a sawi.

State agency chuan, Thawhlehni zan dar 8 velah Israel hian Aleppo international airport chu missile hmangin an kap a, hmanrua tamtak an tichhia a ni, a ti.

United Kingdom-a hmunpui nei Syrian Observatory for Human Rights chuan inbeihna hi a thleng tih an nemnghet bawk.

Israeli missile pali-te chuan airport runway leh Iran-in missile a supply an dah khawmna hmun an kap a ni. Observatory chuan inbeihna avanga thi leh hliam an awm hriat a nih loh thu a sawi rualin, thil puak leh kangmei a chhuah thu a sawi a ni.

SANA chuan Nilaini khan anti-aircraft defence chuan an khawpui Damascus chungah hmelma missile an lo danchah thu a sawi bawk a, missile-te hi Israeli kahchhuah niin an sawi.

Kar hmasa Ningani khan, Hama khawthlang leh Tartous region-ah Israeli air raid vangin civil mi pahnihin hliam an tuar tih SANA chuan a tarlang bawk.

Israel hian Syria-a sorkar thuneihna hmun ṭhenkhat chu vawi za tel an bei tawh a, mahse heng operation-te hi an tih a nih thu an sawi zui khat hle a ni.Aleppo airport beih chungchangah pawh Israel lam hian thuchhuah an la siam lo.

Pathianni khan, Israel hian Syria khawthlang lama sipai hmun chu thlawhtheihna hmangin an bei bawk. Satellite imagery aṭanga a lan danin, bungraw dahna chu kah chhiat a ni a, hei hi Iran thlawp fighter hman tur, middle-range missile an dah khawmna hmun ni a sawi a ni.

June thla khan, Israeli air raid vangin Damascus International Airport chu hnathawk thei loin a awm phah bawk.