Venezuela army base beitute zawng zel

Venezuela sipaite chuan Thawhṭanni-a army base luhchilh a, sipaite nen an inbeih hnua ralthuam ṭhenkhat nena tlanchhe zui ta te chu ngawrh takin an zawn chhunzawm zel.

Valencia khaw bula army base beitu zinga pahnihte chu sipaiten kaphlumin, mi pariat an man bawk a, mahse midang 10 vel chu ralthuam ṭhenkhat lain an tlanchhe hman a ni. Hetilai hian Venezuela sorkar dodaltute chuan army base beih a ni chu an thlawpna lantiri sorkar website eng emaw zat an khawih buai sak zui bawk.

Defence Minister Vladimir Padrino chuan army base beihnaa a hotu ber chu Juan Carlos Caguaripano, National Guard captain hlui a nih thu a sawi. An zingah hian army first lieutenant pawh a tel a, mahse a ni hi man zingah a tel a ni.

Kumin April thla aṭang khan Maduro leh a kaihhruai sorkar duh lohna lantirin eptuten chuan vawi tam tak nawrh an huaihawt tawh a, nawrh huaihawtnaa tharum thawhna thlengah mi 120 chuangin nunna an chan tawh a ni.

President Maduro chuan an ram politics buaina chinfelna leh, boruak siamṭhat theihna kawng awmchhun chu ram danpui siamṭhat a nih thu a sawi a, danpui siamṭha tur hian Constituent Assembly inthlan pawh kar hmasa khan buatsaih a ni. He inthlan hi eptu lam chuan an boycott a, president Maduro-an a thuneihna sawhngheh a tumna hmanrua niin an puh.