NKorea-in US a vau

North Korea chuan US Air Force hmun, Andersen air base awmna, Guam thliarkar chu missile hmanga kahah a vau.

US President Donald Trump-a’n NKorea missile programme kalpui mek sawisel a, khawvelin a la hmuh ngai loh ‘mei leh kât’-a a chhan let tur thu vauna a chhakchhuak a, hemi chhan letna atan hian NKorea chuan Guam thliarkar chu missile-a kahah a vau let ve nghal a ni.

NKorea official news agency, Korean Central News Agency (KCNA) chuan an rama siam, medium-to-long-range Hwasong-12 missile hmanga US tana hmun pawimawh, Guam thliarkar kah dan tur chu ngun taka enfiah mek a nih thu a sawi.

Hetih lai hian Guam Governor Eddie Baza Calvo chuan mipuite chu chiai lo tura hrilhin, an thliarkar tan thil hlauhawm a awm lo tih a sawi. Hemi rual hian thil eng pawh lo thleng tur laka an inpeih reng thu a sawi bawk.

NKorea hian July thla chhung khan nuclear ralthuam ṭum nga a enchhin a, intercontinental ballistic missiles (ICBM) pawh vawi hnih a enchhin bawk. US ram laili lai kap pha tur missile a nei tawh niin a insawi a ni. North hian missile chhunga dah theih tur nuclear ralthuam a siam tumna pawh a tihhlawhtling tawh niin US-a media report chuan a tarlang bawk.

Guam thliarkar hi Pacific-ah, Philippines leh Hawaii inkara awm a ni a, km 541 biala zau a ni. US territory niin he thliarkarah hian mi 163,000 vel an cheng a ni. Thliarkara ram hmun li-a ṭhena hmun khat chu US sipai hmunpui atan hman a ni a, sipai pawh 6,000 vel an awm a, a dang dahluh belh tuma ruahman mek a ni bawk.