Israel-in East Jerusalem-a in pahnih ṭhiahsak

Israel sipaite chuan nimin zing khan East Jerusalem-a Beit Hanina-a in sak thar pahnih chu an ṭhiahsak.

Israel sipaiten in an ṭhiah­sak hi Thaer Siyam-a in sak thar a ni a, zing dar 5 velah bulldozer hmanga nawr chhiat­sak a ni. He in hi luahtu an awm a lo a, square meter 40 biala zau niin, chei pawh ala ni lo a, Thaer-a’n nupui a neih hmaa a luah hman tura buatsaih a nih thu a pa, Ismaeel Siyam chuan a sawi. In bulaa huan siamte pawh tihchhiat vek a nih thu Siyam chuan a sawi.

Siyam chuan an chhungkaw in pali tihchhiat a ni tawh tih sawii, nikum October thla khan ama in an ṭhiahsak a, a fanu leh a fapa dang pakhat in pawh ṭhiahsak an ni tawh bawk tih a sawi. Nimina a in an ṭhiahsak chungchangah hian Jerusalem municipality hnen aṭanga a hma-a hriattirna engmah an hmuh loh thu a sawi bawk.

East Jerusalem-ah hian Palestinian mi, poverty line hnuaia awm mi 324,000 vel an awm mek a, permanet residency status pek niin Isreal sorkar hnenah chhiah an pe a, mahse citizen anga ngaih an ni lo thung.

Israel rights group, B’tselem-in a tarlan danin kumin chhungin East Jerusalem-ah hian Palestinian in, dan loa sak nia sawi 39 thiahsak an ni tawh a, hei vang hian Palestinian mi 140 chu chenna nei loin an awm phah a ni. Hetihlai hian East Jerusalem-ah hian Juda-te chenna tur in 1,500 sak tharna tur chu a pawm thung a ni.