China-a lirnghingah mi 13 an thi
China chhimthlang lam, Sichuan province-ah Thawhlehni zan khan magnitude 7.0-a nain lir a nghing a, mi 13 an thi a, midang 175-in hliam an tuar. Thi zingah hian khualzin paruk an tel. Nimin zing khan Xinjiang bialah magnitude 6.6-a nain a nghing leh bawk.
US Geological Survey chuan Thawhlehni zana lirnghing inṭanna hi Guangyuan khua aṭanga hmarthlang lam, km 200 vela hla, lei hnuai km 10 vela thuk niin a sawi a, he hmun hi khualzinten an tlawh fo ṭhin, Jiuhaigaou nature reserve bul mai a ni.
Sichuan sorkar chuan lirnghing vanga leiminah khualzin 100 vel an la tang niin a sawi a, lirnghinna bial aṭang hian khualzin 31,500 chu hmun him lamah lakchhuah an ni tawh bawk niin a sawi.
China National Commission for Disaster Reduction chuan lirnghing vang hian in 130,000 vel a chhiat a rinawm thu a sawi a, mahse hmun tam tak aṭangin report kimchang an la hre thei lo tih a tarlang nghal bawk.