Myanmar court-in Suu Kyi-i hremna pek belh leh ; Kum 3 chhung hrehawm taka tang turin a hrem

Myanmar hruaitu paihtlak tak Aung San Suu Kyi chu nimin khan kum 2020-a an ram inthlanpui neihah dik lo taka thiltia puhnaah thiam loh chantirin, court chuan kum thum chhung lungin tang a, hrehawm taka hna thawk turin a hrem.

Nobel prize pawh lo dawng tawh leh kum tam tak Myanmar-a sipai rorelna dodaltu, Suu Kyi-i hi nikum February thlaa sipaiten civil sorkar thuneihna an hnehchhuh hnu khan an hreng nghal a ni. Hren a nih hnu hian thubuai hrang hrang siamsakin, a thubuai eng emaw zatah thiam loh chantir a ni tawh a, heng thubuaiahte hian kum 17 chuang lung-in tang tura hrem a lo ni tawh a ni. Mahse an puhna hrang hrangte hi Suu Kyi-i chuan a pha vek thung.

Nimin khan court chuan kum 2020 inthlanpui, Suu Kyi-i party National League for Democracy (NLD)-in chiang taka hnehna an chan ṭumah khan thil dik tawk lo taka tihah puhin thiam loh a chantir a, a ni bakah president aṭanga paihthlak tak Win Mying pawh thiam loh chantirin kum thum tang tura hrem a ni ve bawk. NLD chuan inthlanpuiah hian thil tih dik lo an neih loh thu leh, dik taka an party chu thlan tlin a nih thu an sawi.

Kum 76 mi, Suu Kyi hi hren beh a nih aṭangin kum khat chuang chhung chu a thubuai ngaihtuahin hun a hmang tawh a, eiruk thubuai aṭanga official thuruk ti putrua puhna thubuai thlengin siamsak a ni a, a thubuai neih hrang hrangah hian thiam loh a chang vek a nih chuan kum 190 chuang a tang thei dawn a ni.

Suu Kyi thubuai hi an khawpui Naypyitaw-ah mipui hriat lohin neih a ni a, thubuai chungchanga sipai thuchhuah pawh a bei tham ṭhin hle. Suu Kyi lawyer-te chu chanchinthar lakhawmtute an kawm khapsak an ni bawk.