UN expert-te'n Zaporizhzhia nuclear plant an tlawh

International Atomic Energy Agency (IAEA) team chuan Ukraine-a Zaporizhzhia power plant an tlawh a, hun eng emaw chen awmzui an tum.

IAEA team hi Russia sipaiten an hruai a ni.

Russia-Ukraine indona thleng mekah, Zaporizhzhia power plant bul vel hi beih tel a ni a, mahse ram pahnihte chuan plant beituah hian a inpuh tawn thung.

Europe-a nuclear plant lian ber, Ukraine khawchhak lama awm Zaporizhzhia power plant hi Russia sipaiten February thlaa Ukraine an beih ṭan hnu lawkah khan an awp zui a, Russia sipaite thununna hnuaiah Ukraine staff-te chuan plant hi an enkawl zui a ni.

Plant-ah hian endiktu 8-12 vel chu an awm zui dawn a, he hmuna Ukraine mi hnathawka awmte pawh biak pawh an tum dawn a ni.

IAEA hotu Rafael Grossi chuan plant leh a chhehvelah inbeihna hi chhunzawm zel mah se, endik hna thawh chu an chawlh phah dawn lo tih a sawi.

Ukraine president Volodymyr Zelenskyy chuan inspector-te chuan thutlukna ṭha tak an siam ngei a beisei tih a sawi a, hemi rual hian plant endiktu zinga international journalist an tel lo erawh pawi a tih thu a sawi. "Russia chuan palaite bum tum hian thil tenawm tak pawh an tih duh ngei ang tih kan chiang a ni. IAEA aiawhte hnena dawt sawi tur hian mipuite pawh nawr luih an ni," a ti.

Zelenskyy-a chief of staff, Andriy Yemrak chuan IAEA hmalakna tihbuai tumin Russia chuan plant bul hnaia Enerhodar khua chu a bei niin a puh a, Russia chu firfiak ram ang maia cheah a puh a ni. Mahse a puhna hi Russia chuan a pha thung a, Ukraine mi 60 vel chuan Ningani zing khan plant hi lak tumin an bei niin a sawi thung a ni.