Israel tan-ina tang mek Palestinian mite'n chaw ngheia nawrh huaihawt dawn

Israel ram tan-ina tang mek, Palestinian mi 1,000 chuangte chuan enkawlna an dawn dan chungchangah lungawi lohna lantirin a huhoa chaw ngheia nawrh huaihawt an tum.

Nikum September thlaa tan-in aṭanga Palestinian mi paruk an tlanchhuah hnuah, Israel hian tang khuahkhirhna hi a tikhauh zual a ni.

Israel ram tan-inah hian Palestinian mi 4,500 vel an tang mek a, an zinga 700 vel chu thubuai pawh siamsak lo, rinhlelh man an ni. Israel chuan he ruahmanna hi an ram venhimna atan a ṭul tih a sawi , mahse civil liberty group lam chuan mihring dikna chanvo palzutna niin an puh thung.

Palestinian tangte hian an tan-ina an dinhmun chhe lutuk tiziaawm tura Israel thuneitute nawr nan chaw ngheia nawrh hi an huaihawt fo ani. Nikuma tang paruk an tlanchhuah hnuah an dinhmun hi a chhe zual niin an sawi. Palestinian Authority-a prisoners committee-a an hotu chuan tangte thil phut hi thuneitu lamin an ngaihsak loh chuan, Palestinian tang dang tam zawkin nawrh huaihawt hi an zawm leh tur thu a sawi.