NKorea-in Guam beih dan tur peihfel thuai tum

North Korea chuan missile hmanga Pacific tuipuia US thliarkar, Guam beiha a vau hnuah, Guam thliarkar beih dan tur hi August thla laihawl hian peihfel a tum.

NKorea state media chuan Guam beih dan tur ruahmanna siamte chu NKorea ram hotu, Kim Jong-un hnenah pek a ni ang a, a ni hian a tak kalpui a nih tur leh tur lohah thutlukna a lo siam dawn a ni, a ti.

Guam thliarkarah hian mi 163,000 vel an cheng a, US military base a awm a, submarine squadron, airbase leh Coast Guard group-te an awm a ni.

Korea People’s Army (KPA) commander, General Kim Rak Gyom chua KPA-in Hwasog-12 rocket a kahchhuah tur chuan Shimane, Hiroshima leh Koichi Prefecture-te thlawh khumin, km 3,356.7 chu second 1,065 chhunga thlawkin Guam aṭanga km 30-40 vela hla tuipui a fuh dawn niin a sawi.

Hetih lai hian Guam Governor Eddie Calvo chuan NKorea vauna chungchangah engmah hlauh tura awm loh thu a sawi a, eng thil pawh lo thleng turin invenna lamah an inbuatsaih a, White House pawh a be pawp reng tih a sawi.

US chuan NKorea ballistice missile leh nuclear programme tihtawp sak turina a sipai chakna hmang turin a inpeih reng tih a sawi a, mahse sipai chakna hmang loa in­biakna hmanga chinfel dan zawn te, NKorea hrek­na siamte chu a la thlang zawk rih niin a sawi. UN Security Council chuan kar hmasa Inrinni khan NKorea ram hrekna thar hi a siam a ni.

NKorea hian nikum khan nuclear bomb pahnih a enchhin a, kumin July thla khan intercontinental ballistic missile ṭum hnih a lo enchhin tawh bawk. President Trump chuan NKorea-in US ram kappha tur nuclear ralthuam a siam hi an remti ngai dawn lo tih a lo sawi tawh a ni.