Canada sipaiten refugee camp an siam
Canada sipaite chuan US ramri kana an rama refugee lut an pun zel avangin heng mite awmna tur hian refugee camp an siam.
Refugee camp hi aint-Bernard-de-Lacolle, Quebec-ah an siam a, mi 500 vel awm theihna tura duan a ni. Kumin January 1 aṭanga June 30 inkar chhung khan Quebec-ah hian raltlan 3,300 vel an lut tawh a ni. US aṭanga raltlan lut an pun zel avang hian Montreal-a Olympic Stadium-ah awm lailawk tir an ni a, hei vang sipaite chuan refugee camp hran hi an sa ta a ni. Camp-ah hian Canada sorkar nena inhumhim dilna an thehluhte ngaihtuahsak an nih chhung an awm dawn niin sipaite chuan an sawi.
Canada sorkar hnena humhim dilna thehluh hi 700 vel a awm mek a, heng dilna te hi ni hnih thum chhung vela ngaihtuah fel theih beisei a nih thu Canada Border Services chuan a sawi.
US President Donald Trump chuan May thla khan US-in kum 2010-a lirnghing rapthlak tak an tawh avangin Haiti mite hnena humhimna a pek chu January 2018-ah tihtawp a nih tur thu a sawi a ni. Hei vang hian US-a Haiti mi lut tam tak chuan Canada lam hi an pan a ni. Haiti sorkar pawhin Quebec sorkar aiawhte be turin official pahnih a tir tawh bawk.