EU hruaitute an inrem ta
European Union (EU) summit neih zawh takah European Council chuan kum 2021-2027 chhunga multiannual budget atan euro trillion 1.8 a pawm a, hruaitute an inrem theih loh hnuah Covid-19 vanga ram economy siam ṭhatna tur atana euro vbc 750 package siam chu nimin zing khan an pawm tih European Council president Charles Michel chuan a sawi.
He package-a euro vbc 750 chu recover plan atana non-repayable grant leh loan anga pekchhuak tur a ni. Summit kaihruaitu Michel chuan inremna an siam theih thu a sawi bakah, Europe ramte chuan ṭanho ṭhat thu te, an inremna hian Europe ram chu kawng dika a hruai ngei a rin thu a sawi bawk.
Kar liam ta Zirtawpni aṭang khan Brussels-ah EU hruaitu mi 27 chuan summit hi an nei ṭan a ni. Ni hnih awh tura tih ni mah se thu an rel fel theih mai loh avangin nimin thleng khan an pawtsei chhunzawm a ni. Kum 2000-a France rama Nice khuaa summit an neih ṭum khan ni 5 chhung summit an nei a, hemi hnuah kumin summit hi an neih rei leh ber a ni zui ta a ni.
Kar kal ta khan recover plan euro vbc 750 zinga euro vbc 500 chu hri leng tuar nasa zual ramte tan non-repayable grant angin pek tura rawt a ni a, mahse he rawtna hi EU member ṭhenkhatte chuan an sawisel bakah, a bikin Frugal Four an tih Netherlands, Denmark, Sweden leh Austria ramte chuan non-repayable grant hi an duh lo a ni. Hei vang hian Covid-19 vanga ram economy siam ṭhatna tur package an duan hi an pawmtlang thei mai lo a ni.
An inrem theih loh hnuah nimin zing lam khan EU hruaitute chuan recover plan euro vbc 750 zinga euro vbc 390 chu non-repayable grant angin pek turin an rel thlu a, a dang euro vbc 390 chu loan-a pekchhuah thei turin an rel thlu bawk.