Philippine President-in mask vuah lo manah vau

Philippine sorkar chuan an ramah Covid-19 kai an pun zel avangin test tam zawk neih tumin hma an la dawn tih sawiin, President Rodrigo Duterte chuan mask vuah loa pawn chhuakte chu man zelah a vau. 

Health secretary Francisco Duque chuan a hmaa ni khatah test 20,000 - 23,000 neih ṭhin chu 32,000 - 40,000-ah tihpun tum a nih tih TV-ah a sawi. Philippine ramah hian mi maktaduai 1.1 vel chu an sample test sak an ni tawh. 

Duque chuan test tam zawk neih chhoh tum ni mah se, an ram mipui zawng zawng chu an test thei dawn lo tih sawiin, hei hi khawvela ram  hausa US pawhin a ti thei bik lo a ni, a ti. 

President Duterte thusawi pawh nimin khan tihchhuah niin, an rama hri thehdarh a, mask vuah duh lo leh midangte nena inhlata awm ṭha duh lote chu man zelah a vau. President hian April thla khan hri leng khuahkhirhna tura inkharkhipna kalpui palzutte chu silaia kahah a lo vau tawh bawk.