WHO-in Africa ramte inralring turin hriattir
World Health Organization (WHO) chuan Africa khawmual chu Covid-19 hri darh hluai thei dinhmuna an din tak avangin inralring turin a hriattir.
Africa ram zinga South Africa-ah hian kar liam ta Zirtawpni khan hri kai thar mi 13,373 an awm a, anni nen hian hri kai tawh zat hi mi 3,73,628 an tling tawh a ni. Hei vang hian WHO chuan SAfrica aṭanga hian Africa khawmual pum puiah hri hi a darh zel an hlauhthawn vangin inralring turin a hriattir ta a ni.
WHO emergency chief Michael Ryan chuan SAfrica ramah hian hri a darh hle thu sawiin, hei vang hian Africa khawmual pumah hri hi a darh chho mai a hlauhthawnawm tawh a ni, a ti. Khawvela Covid-19 hri kai tam ram pangana ni mek SAfrica-a Covid-19 vanga thi hi mi 5,173 an awm tawh a, enkawl dam hi mi 1,94,865 an awm tawh bawk.
Africa khawmual puma hri kai zat hi nimin thleng kha chuan mi 7,40,026 an awm tawh a, thi zat hi mi 15,465 an awm bawk a, hri kai enkawl dam tawh hi mi 3,92,377 an tling tawh bawk. SAfrica ram bakah hian Africa ram zinga hri hluarnate chu Egypt, Nigeria, Ghana leh Algeria ramte a ni.