US-in blacklist-ah Chinese company 11 telh belh

US Commerce Department chuan Thawhṭanni khan blacklist-ah Chinese company 11 a telh a, a telh chhan hi human rights an palzut vang niin department chuan a tarlang.

China hmarthlang lama awm Xinjiang biala Turkic ethnic minority group Uighur chunga China chet dan chungchangah US chu tunhma aṭang tawh khan a lungawi tawh lo a ni. Xinjiang bialah hian Uighur leh muslim minority-te chu camp siamsak an ni a, US chuan he camp-a awm te hi China-in nasa takin a rapbet niin China a puh a, an dikna chanvo laksak an ni a, hnathawkah te chhawr luih an ni a. 

Changji Esquel Textile, Hefei Bitland Information Technology, Hefei Meiling, Hetian Haolin Hair Accessories, Hetian Taida Apparel, KTK Group, Nanjing Synergy Textiles, Nanchang O-Film Tech leh Tanyuan Technology-ahte hian chhawr luih an ni tih US Commerce Department chuan thuchhuah a siamah hian a tarlang. Mahse China chuan he camp hi re-education camp niin a sawi thung. US Commerce Department chuan a hmain Chinese Company 28-te chu blacklist-ah a lo telh tawh bawk.