United States do turin NKorea mi maktaduai 3.5 sipaiah inziaklut

US leh North Korea inkar boruak a chhe chho zel a, hetih lai hian indo a chhuah palh pawha US do thei turin Norea Korea mi maktaduai 3.5 dawn chu sipaiah an inziaklut niin, NKorea state media chuan a tarlang.

Missile a enchhin chhunzawm zel avanga UN-in North Korea ram hrekna thar tur a siam chu NKorea chuan a pawm lo tih a lo sawi tawh a, he hrekna siam hi a do let tur thu pawh August 7 khan a sawi a ni. Hemi hnu hian an rama ṭhalaite chu armed forces zawm turin sawm an ni a, ni thum chhungin mi maktaduai 3.47 an inziaklut a, an zingah hian zirlai leh sipai bang tawhte pawh an tel a ni. An ram mipuite chu US do let turin an inpeih niin a tarlang.

North Korea-ah hian mihring maktaduai 25 vel an cheng a, sipai hi nuai sarih aṭanga maktaduai 1.3 vel an awm mek a ni.

NKorea hian US President Donald Trump-a’n an ram a vauna chhan let nan Pacific-a US territory, Guam thliarkar chu ballistic missile hmanga kahah a vau a ni. NKorea hian a missile hi a kapchhuak a nih chuan minute 14 velah Guam hi a thleng thei dawn nia sawi a ni. He missile kah dan tur hi an ruahman mek a, NKorea hotu lu ber Kim Jong-un-a’n a pawmpui chuan tun thla laihawl velah kahchhuah tum a ni. An missile kah tum Hwasong-12 hian Japan tuipui thlawh kanin, Guam thliarkar aṭanga km 30-40 vela hla tuifinriat-ah a tla dawn a ni. Hetih lai hian NKorea hian a hmaa he missile hi a lo enchhin tawhnaah vawi khat chiah a la hlawhtling nia sawi a ni.

White House chuan NKorea beihna laka Guam hum turin US sipaite an inpeih tawh niin a sawi. President Trump chuan Guam Governor Eddie Calvo chu telephone-a biain, sipaite chu an inralring reng a, Guam leh America mite hima turin theihtawp an chhuah dawn tih a sawi. Governor Calvo pawhin thliarkara chengte chu hlauthawng lo turin alo chah tawh bawk.

President Trump chuan NKorea hian US a bei hmasa a nih chuan a inchhir hle dawn tih a sawi a, US sipaite chu inralring rengin an awm tawh a ni, a ti.

Hetih lai hian China President Xi Jinping chuan President Trump chu NKorea chung­changah buaina tisosang zawnga ṭawng lo turin a ngen. Kar kalta Inrinni-a telephone-a an inbiaknaah China President chuan ṭawng fimkhur turin President Trump hi a ngen a ni. Hemi rual hian NKorea buaina chingfel turin China chuan US thawhpui chu a inpeih reng tih a sawi. President Xi chuan NKorea chungchanga buaina chu a punlun zel lohna turin he thila inhnamhnawih ramte chu insum tura a duh thu leh, inbiakna hmanga a chinfel dan kawng zawng tura a duh thu a sawi.