Venezuela-in President Trump-a vauna hnawl

US President Donald Trump-a’n Venezuela chu UN leh international law a bawtchhiat avangin an lakah sipai chakna hman a ngai lo ang tih sawi theih a ni lo tia a sawi chungchang chu, Venezuela chuan a pawm lo tih a sawi.

Venezuela Foreign Minister Jorge Arreaza chuan US President-in an ram vauna chungchang chu an pawm lo tih a sawi a, President Trump-a chu remna leh muanna tichhe zawnga ṭawngah a puh bawk.

Latin America ram hruaitu dangte pawhin President Trump thusawi hi an dem thu an sawi a, Bolivia President Evo Morales chuan Trump-a thusawi chungchangah ramdangte an ngawi tlat chu a sawisel bawk. Morales chuan US-in Vene­zuela lakah sipai chakna hman a hreh loh thu a sawi chu an dem takzet tih sawiin, Venezuela chuan tualchhung buaina an tawh mek chu inbiakna hmanga chinfel dan a zawng reng a ni, tiin a twitter-ah a ziak.

Venezuela sorkar hian an ram danpui siamṭha tur­in National Constituent Assembly (ANC) a din a, hei hi eptu lam chuan nasa takin an dodal a, khawvel ram hrang hrang pawhin an dem a ni. Ram danpui siamṭhat hi Vene­zuela President Nicolas Maduro-a’n a thuneihna tihngheh a tumna hmanrua niin an ngai a ni.