Burkina Faso-a restaurant beihnaah mi 17 an thi

Burkina Faso khawpui, Ouagadougou-ah Pathianni zan khan firfiakten Turkish restaurant an bei a, mi 17 an thi a, mi dang pariatin hliam an tuar.

Mita hmutute sawi danin Pathianni zan khan silai keng mi pathumte chuan pickup truck-in restaurant hi an pan a, pawn lama ṭhute chu an pawng kah ta a ni.

Pawikhawihna thlenna hmun­ah hian sorkar chuan security force-te a tir nghal a, darkar sarih zet an inkap zui a ni. Security force-te chuan pawikhawihtu pathumte chu an kaphlum a, restaurant beihnaah hian midang inrawlh an awm em tih hriat a ni lo.

Communication Minister Remis Dandjinou chuan mi eng zat nge inrawlh hriat a ni loh thu a sawi a, pawikhawihtute hi restaurant building-ah tawmin security force-te nen hian an inkap tih a sawi. Restaurant beihnaa thite hi ram hrang hrang mi an nih thu minister chuan a sawi bawk.

Burkina Faso-ah hian firfiakte pawikhawihna a thleng fo a, kum 2016 January thla khan Ouagadougou-a cafe pakhat chu firfiakten an lo bei tawh bawk a, mi 30 an thi a ni. Al-Qaida leh firfiak pawl dang, Al Mourabitoun chuan cafe beitute an nih thu an sawi. Kum 2016 December thla khan hmar lama army base chu beih niin sipai 10 chuang an thi bawk a ni.

Islamic State (IS) firfiak pawl chuan Pathiannia restaurant beitu an nih thu an sawi ve bawk.