Nepal tuiliana thi zat mi 64 an tling tawh

Nepal rama ruahsur nasa avanga tuilianah mi 64 an thi tawh niin, Home Ministry chuan a sawi.

Nepal ramah hian ni thum chhung nasa taka ruah a sur avangin tui a lian a, hmun hrang hrangah lei a min bawk. Home Ministry chuan Pathian­ni khan thuchhuah siam­in, Terai biala district hrang hrangah chin hriat lohin mi 53 an awm mek tih a sawi.

Terai biala tuilian leh leimin avang hian chhungkaw tam tak chu chenna nei loin an awm mek a, an in, thlai chin leh ran vulh tam tak an chan bawk. Tuilian hi phaizawla awm, district 10 chuangin an tuar mek a ni.

Ministry chuan tuilian hian chenna in 35,000 chuang a chim tawh niin a sawi. Sorkar chuan tuilian tuarte chhawmdawlna pek an nih tur thu a puang a, tuilian leh leimin avanga thi chhungte chu repees 200,000 (US dollar 1,949) ṭheuh pek a ni dawn tih a sawi. Tuilian tuarte hnena ei tur tur sem dan turte, an awmna tur ngaihtuahsak leh thawmhnaw pek dan tur ngaihtuahin emergency cabinet meeting neih a ni bawk.

Nepal Police, Nepal Army leh Armed Police force-te chu tuilian tuarte chhanchhuah leh chhawmdawl hna thawk turin Terai bialah hian tirh an ni. Tuilianin lei a chim chhiat avang leh kawngpui a min chhiat vang te, inbiakpawhna lama harsatna a awm avang tein chhawmdawl hna hi a thawh chak theih lo a ni. Hei bakah hian ruah a la sur chhunzawm reng vangin hnathawktute tan pawh chet chak a har phah bawk a ni.