Sharif-a’n PM paihthlak theih lohna dan siam tum

Pakistan Prime Minister aṭanga paihthlak tak, Nawaz Sharif-a chuan an rama dan an hman mek chu a hlui tawhin a ṭha tawk tawh lo tih sawiin, hei vang hian Prime Minister ṭanglai paihthlak theihna dan awm mek pawh tihtawp a nih theih nan dan thar siam tumin a bei dawn tih a sawi.

Nawaz Sharif-a hi Panama Paper leak-ah ram pawn lamah amah leh a chhungte hminga in leh company neia tarlan a nih chungchang court-in a ngaihtuahnaah thiam loh chantir a nih avangin PM a nihna aṭangin ban a ni. Amah thlaktu tur hi thlan a ni tawh bawk.

Sharif-a hian ni thum thangin an rama khawpui hrang hrangte a tlawhkual a, Lahore-a rally neihnaa thu a sawiah an party kaihhruai sorkar chuan ram danpui siamṭhat a nih theihna turin rawtna a siam dawn tih a sawi. Dan an hman mek chu a dik tawk lohna tam tak a awm a, hei vang hian system thar leh ram danpui tharte an neih a hun tawh niin a sawi.

Awlsam taka prime minister ban mai theih tawh lohna tur dan thar siam a ngai a, hemi siam a nih theih nan hian a bei zel dawn tih, Sharif chuan a sawi. Hei bakah hian Panama Paper case chungchangah amah bantu judge panga-te chu sawiselin, PM ban turin an qualify chiah em tih a zawt let bawk.