Mali-a UN camp beihnaah mi pasarih an thi

Mali hmarlam, Timbuktu khuaa UN headquarters chu beih a ni a, mi pasarih an thi a, midang pasarihin hliam an tuar bawk.

UN chuan UN camp hi Thawhṭanni tlai kha beih a nih thu leh, camp beitu zinga mi paruk chu UN sipaiten an kahhlum thu a sawi. Camp beihnaa thi zingah hian Malian security guard panga bakah, UN mission hnuaia contractor pakhat leh Malian gendermeri member pakhat an tel a ni.

UN thupuangtu Farhan Haq chuan Thawhṭanni vek han central Mali-a Mopti biala UN camp pahnih, Douentza ami chu silai kengten an bei bawk a, Mali sipai pakhat leh UN sipai pakhat an that a, pawikhawihtute hi kahhlum an ni bawk tih a sawi.

Mali-a UN mission, MINUSMA hotu Mhamat Saleh Annadif chuan thuchhuah siamin, Douentza-a UN camp beih a nih lawkah Timbuktu-a UN headquarters beih a ni leh chu a dem thu a sawi a, pawikhawihtute chetdan chu dawihzep leh tenawm a tih thu a sawi.

UN Secretary General Antonio Guterres pawhin UN hmun leh muanna sipaite beih a ni chu a dem thu a sawi a, he thil thleng hi international law hnuaiah war crime a tling a ni, a ti.

UN peacekeeping operation hi khawvel ram 16-ah neih mek a ni a, heng zingah hian Mali ram hi a hlauhawm ber niin, mission staff pawhin an tuar ngun ber a ni.

Kum 2012-a sipai chakna hmanga sorkar paihthlak a nih hnu khan, Mali hmarlam bial hi inlakhran duhtu pawlte thununna hnuaiah a la awm a ni. Tualchhung buaina chinfel pui tur hian kum 2013 khan France sipaite pawh tirh luh an ni a, a hnuah UN mission, MINUSMA tih hnuaiah UN muanna sipai 12,000 tirh an ni leh bawk. Mission kalpui a nih aṭang hian MINUSMA staff 128 chu hel kutah an thi tawh a ni.